我選溫泉旅館第一要緊的當然是溫泉, 其次是房間和清潔感, 最後才是膳食和服務. 川之湯溫泉區只有一間旅館是100%泉源, 但這家旅館的房間在JALAN的評分只有3.5, 深怕同行友人會嫌棄, 所以決定入住這間各樣評分都有4.2或以上的鹿の湯ホテル.

罵人, 都是用廣東話比較好.

我地駕車去到停車場, 停車場就在旅館出面, 當時落緊好大雨, 咁我地搵倒個位就泊入去, 然後落行理, 點知落完行理就有個人走埋黎話駕車吾可以泊係果個位, 終於我就先去check in, 留番個司機再泊過.

入到旅館, 無人o既?! 原來要搭電梯上一樓, 上到一樓, 嘩! 仙境呀! 然後開始嫌煩, 成間旅館都係煙味, 可能係之前有班日本佬啱啱check in完. 去到櫃位, 個大嬸愛理不理咁睇住我張email, 繼續同其他人講野, 呢D野我吾太介意, 嬲佢會傷身, 但無諗過一向以服務見稱o既日本溫泉旅館會請個咁o既人返黎.
之後就入房啦, 入到房度覺得吾錯喎, 吾計玄關同廁所, 有8疊大空間, 仲加埋兩張單人床添, 因為旅館位處山頂, 所以景觀好開揚, 之但係果兩張床......今晚吾係要瞓呢個下話, 張床褥襟落去吾識得彈番轉頭架喎, 張床單望落D汚漬一撻一撻咁, 以前瞓果D人吾通成日流口水? 好汚漕咁喎.

旅館派左個識少少英文o既服務員黎講解, 初初都無乜野, 點知佢越講越多野, 嘻皮笑臉, 越講越煩, 阿哥, 家下七點幾啦, 我趕住食飯同浸溫泉呀! 查實我果D旅遊日文都應付得黎, 佢同我講日文等我練習下好過.

閙還閙, 但係都要讚下預備食物o既嬸嬸, 佢本來想我地浸完溫泉至食飯, 但我地堅持食左飯先至浸, 佢吃一驚, 但都話會儘快預備, 都幾快, 15分鐘後有得食, 食物都OK, 都值四分o既. 食到尾聲個嬸嬸問我今晚瞓床定係塌塌米, 當然係瞓地啦, 我都吾知幾鬼開心.

食飽飽就去浸浸啦, 個浴場好乾淨, 內湯都OK, 去到露天風呂, 都好乾淨, 但係就越浸就越煩, 越浸就越X憎, 邊有人浸溫泉好似係泳池浸按摩池咁嫁, 個池直頭就係一個按摩池, 但係又無力度, 淨係不停咁出泡泡, 嘈到柝天, D水因為不停搞動所以吾熱, 一路震一路浸, 隔離個池就細到淨係可以坐倒一個人, D水仲要熱到跳舞. 簡正直就係一個惡夢, 浸完出黎個腦仲不停咁薄薄聲, 想死!

返到房見到床已經舖好, 好開心咁瞓落去, 點知一個轉身俾我見倒一隻細小的"小強"係我枕頭邊, 嚇得我丫, 雖然已死, 但係個心都吾太舒服, 拿拿臨起身翻起晒D床舖睇一次, 我吾係好想與敵同眠.

本來我對呢個旅程安排都好滿意, 都會比自己九十分, 就係呢間旅館, 要倒扣十分, 返到黎香港我狠狠地係jalan, 除左食物, 每樣都比個一分佢, 以消我心頭之憤.

可能係朱玉在前, 我實在覺得呢間野好吾店!

創作者介紹

鐵皮屋上做的夢

joeyee 發表在 痞客邦 PIXNET 留言(3) 人氣()


留言列表 (3)

發表留言
  • lau2tang
  • 呢間真係黑店,要記低佢先!為因我都好驚中地雷。
  • 見倒張床至嚇一跳, 仲要吾夠三呎濶, 呢間野依家仲有4.3分架! 佢個位置開揚, 望出去又都幾舒服.
    依家無4.6分我都有保留, 吾會期望太高.

    joeyee 於 2009/12/11 23:15 回覆

  • 小臣
  • 可以差成咁!!好難想像.咁小臣都算好彩.
  • 可能係我吾好彩啦, 佢個風呂有4.4分, 係好乾淨, 但係都吾明D日本人點解會鍾意又細又嘈GE浴池, 浸溫泉係應該靜加馬, 卜卜聲, 煩死人.
    深山桵庵又大又可以數星星GE風呂都係得4.6分.

    joeyee 於 2009/12/11 23:13 回覆

  • 小頭
  • JALAN 評分係我選旅館的明燈指引....呢次好大整蠱噃
  • 一地碎片呀陰功!

    joeyee 於 2009/12/13 13:55 回覆